‘डियर तुकोबा’ ह्या मराठी पुस्तकान पुराय महाराष्ट्राक हालोवन सोडपी तरनाटो साहित्यीक विनायक होगाडे गोंयां येता. शेनवारा, 15 फेब्रुवारीक सकाळफुडें नावेलेच्या रोझरी कॉलेजींत जावपी युवा साहित्य संमेलनाचें उक्तावण करपाक.
आगळेच तरेन साहित्य रचपी ह्या लेखकाक मेळपाची गोंयच्या तरनाट्यांखातीर ही सुवर्णसंद.
मूळ महाराष्ट्रांतल्या इचलकरंजीचो होगाडे सद्या दिल्ली ‘बीबीसी’खातीर पत्रकार म्हूण काम करता. हेचे आदीं लोकसत्ता, टायम्स इंटरनॅट आनी ई-सकाळाखातीर काम केलां. पूण महाराष्ट्रभर तेची नामना आसा ती एक सर्जनशील तरनाटो साहित्यीक म्हुणोन.
तेचीं आतांमेरेन तीन पुस्तकां येयल्यांत. ‘फिलिंग अस्वस्थ’ (2017), ‘ओह माय गोडसे’ (2019) आनी ‘डियर तुकोबा’ (2022). ‘विठोबा मिसिंग इन पंढरपूर’ प्रकाशनाचे वाटेर आसा.
विनायक होगाडेचो इन्स्टाग्राम प्रोफायल
भन्नाट ‘डियर तुकोबा’
ह्या सगळ्यामदीं चड गाजलें तें तेचें ‘डियर तुकोबा’ हें पुस्तक. तें प्रसिद्ध जालें तेन्ना तेका साहित्याच्या खंयच्या विभागांत घालचें हो प्रस्न समीक्षकांक पडलेलो. कारण तें पुस्तक आसा तीन विभागांनी. एक – अभंगाचे शैलींत बरयल्लीं ‘तुकारामायण’ हीं तुकोबावेलीं कवनां, दोन – ‘मिडिया ट्रायल ऑन तुकोबा’ ही धम्माल कल्पकथा आनी तिसरो – लेखकान तुकोबाकडेन केल्लो ‘डियर तुकोबा’ हो संवाद.
तेतूंतल्या ‘तुकारामायणां’त तुकोबाक मेळपाक महात्मा गांधी धरोन, सॉक्रेटिस, गॅलिलियो, आंबेडकर ते दाभोलकर आनी गाडगेबाबा-कबीर ते ज्योतिबा आनी शाहू महाराज अशे कितलेशेच प्रेषित येतात. अभंगाचे शैलींतलीं हीं कवनां म्हुणल्यार चिन्तनाचें पेटूलच कशें.
सगळ्यांत धमाल आसा ती तुकोबावेली ‘मिडिया ट्रायल’. तुकारामाच्यो गाथा इंद्रायणींत बुडोवपाचो आदेश काडटात तेन्ना आयचो काळ दाखयला. म्हुणल्यार टीव्ही, इंटरनॅट, सोशल मिडिया अशीं सगळीं डिजिटल प्रसारमाध्यमां. म्हुणल्यार आज तुकोबा आशिल्लो जाल्यार कितें जावपाचें तेचें जितेंजिवें चित्रण.
हें पुस्तक सगळ्याच पिरायेच्या आनी वेगवेगळ्या थरांतल्या लोकांनी उखलून धरलें. स्पृहा जोशीसारक्या कलाकारान लेगीत. (हिंगा क्लिक करून तो व्हिडियो पळय).
गांधी-गोडसे मेळटात तेन्ना…
‘ओह माय गोडसे’ हेंयबी तितलेंच भन्नाट पुस्तक. तेतूंत महात्मा गांधीक मारपी गोडसेचे करणेन भारावन गेल्ल्या कलाकाराक जाग्यार हाडपाखातीर तेचे इश्ट तेका गांधीच्या काल्पनीक आश्रमांत व्हरून तेणे खून केल्ल्या गांधीक मेळयतात. तेंचेमदलो संवाद आयचे तरणे पिळगेन वाचूंकच जाय असो आसा.
असल्यो सगळ्यो धमाल कल्पना घेवन साहित्य रचपी हो तरनाटो फकत पत्रकारिता करून ओगी बसना. सगळ्याक भोंवता आनी व्याख्यानांय दिता. खासा करून महात्मा गांधी, महाराष्ट्रांतली भक्ती चळवळ, संत तुकाराम आनी संत कबीर ह्या विशयांचेर.
तेच्या ह्या धडपडी कार्याखातीर तेका धायेक पुरस्कारूय फावो जाल्यात. साहित्य अकादमीचो युवा साहित्य पुरस्काराखातीर नामांकनूय जाल्लें.
संवसारांतलें साहित्य विश्व कूस परतुपाक लागलां. नवनवे साहित्य प्रकार तरणी पिळगी मुखार हाडपाक लागल्या. तेतूंतलो देखदिणो म्हुणल्यार विनायक होगाडे.
तो भाशण करतलोच, पूण गजाली मारपाकूय मेळटलो. तेचीं पुस्तकांय विकपाक आसतलीं. ही संद घेतली जाल्यार तरनाट्या साहित्यिकाक एक नवी नदर मेळपाक शकता. ती जाय जाल्यार सर्जनशील तरनाट्यांनी मुजरत ही संद घेवची. शेनवारा आनी आयतारा.
